Profesorët përballë ligjit

Ky publikim sjell në vëmendjen e publikut mënyrën se si administrohet drejtësia në rastet kur të dyshuarit, të akuzuarit ose të dënuarit janë pjesëtarë të stafit akademik të Universitetit të Prishtinës (UP), universitetit më të madh publik në vendin tonë. Andaj, raporti në thelbin e tij përqendrohet në raste konkrete të shkeljeve të ndryshme të kryera prej pjesëtarëve të këtij stafi, si brenda universitetit, ashtu edhe jashtë tij, për të hetuar nëse ato kanë rezultuar me ndonjë pasojë për angazhimin e tyre akademik. Në pjesën e parë të raportit paraqiten rastet kur pjesëtarë të stafit akademik të UP-së dyshohen të kenë shkelur në çfarëdo mënyre Kodin e Etikës të UP-së; kurse në pjesën e dytë, paraqiten rastet e përballjeve të stafit akademik me ligjin në Kosovë, që kanë rezultuar me kallëzime penale, aktakuza, ose dënime nëpër institucionet e drejtësisë, qoftë edhe për veprime që nuk lidhen me punën e tyre në UP.