Ka studiuar Shkencat Politike në Universitetin e Prishtinës, kurse magjistraturën për Demokraci dhe të Drejta të Njeriut në programin e përbashkët studimor të Universiteteve të Bolonjës dhe të Sarajevës. Ka punuar si hulumtues për institucione të ndryshme. Është autor i shumë botimeve (librave dhe artikujve). Kohët e fundit, ka botuar shumë artikuj rreth historisë së Kosovës në tekstet mësimore të historisë në Kosovë dhe në vendet përreth Kosovës – Shqipëri, Sërbi, Mal të Zi dhe Maqedoni. Boton shpesh artikuj politik dhe recensione librash në shtypin shqiptar.

Është linguist, redaktor dhe përkthyes. Ka përfundu studimet Bachelor në Gjuhësi në Universitetin e Londrës dhe mandej studimet Master në Gjuhësi në Universitetin e Prishtinës. Është redaktor në shtëpinë botuese Rrokullia dhe punon si përkthyes i pavarur për një sërë ambasadash, për qeverinë kosovare e qeveri të jashtme dhe agjenci joqeveritare. Gjithashtu, punon si mësues privat i shqipes për studentët e huaj. Është autor i një sërë artikujsh për çështje gjuhësie të shqipes.

Është Profesor i Asocuar në Departamentin e Shkencës Politike pranë Universitetit të Prishtinës. Ai ka studiuar Shkenca Politike (drejtim primar), dhe drejtime dytësore Histori të Europës Juglindore, Drejtën Publike Krahasimtare, Shkencat e Komunikimit Publik, dhe Gjuhë Gjermane pranë Universiteteve të Prishtinës (1994), Gracit ‎(1995-1999), Vjenës ‎(2000-2005) dhe Huddersfieldit (2002). Ai ka hulumtuar dhe publikuar gjerësisht për vendet e Ballkanit Perëndimor. Teza e tij e doktoratës mbi Integrimin në BE dhe Krijimin e Paqes Afatgjate në Ballkanin Perëndimor fitoi çmimin për vepër shkencore të vitit 2005 nga Fondacioni Europian Dr. Alois Mock dhe është publikuar në tetor 2007 nga shtëpia botuese NOMOS. Që nga 2001 ai ka vepruar si bashkëpunëtor shkencor në Qendrën për Europën Juglindore pranë Karl-Franzens Universitetit të Gracit. Nga 2003 deri 2005 ai punoi si bashkëpunëtor shkencor pranë Institutit Austriak për Politikë të Jashtme në Vjenë. Nga 2007 deri 2011 ai ishte bashkëpunëtor shkencor pranë Akademisë Europiane Bolzano. Në vitin akademik ‎2007-2008 ai mori pjesë në programin Fulbright Hubert Humphrey në SHBA ku punoi pranë Universitetit të Karolinës Veriore në Chapel Hill dhe Qendrës Ndërkombëtare për Studiues Woodrow Wilson në Washington DC. Nga 2009 deri 2013 ai punoi si Këshilltar i Lartë për Organizatën për Siguri dhe Bashkëpunim në Europë, Misioni në Kosovë. Në 2005 ai u zgjodh Asistent Profesor dhe në 2010 Profesor i Asocuar pranë Universitetit të Prishtinës, Departamentit të Shkencës Politike. Në vitin 2009 ai themeloi Qendrën për Kurajo Politike.

Me një sfond prej fushës së shkencave politike dhe gazetarisë, ka qenë i angazhuar në sektorin e shoqërisë civile për më shumë se 8 vjet. Ai ka punuar në ÇOHU!, një nga organizatat prijëse në fushën e sundimit të ligjit dhe antikorrupsionit. Për një kohë, Loriku drejtoi një grup hulumtuesish brenda organizatës dhe pas disa vitesh ai arriti të bëhet drejtues i organizatës, të cilën e drejtoi për gati 3 vjet. Është njëri prej themeluesve të Qendrës Kosovare për Gazetari Hulumtuese, e para platformë online e shoqërisë civile e bazuar tërësisht në gazetari hulumtuese. Duke iu bashkuar shoqërisë civile pak para shpalljes së pavarësisë së vendit më 2008, Loriku përcillte drejtpërsëdrejti disa nga momentet më të rënda të procesit të ndërtimit institucional në Kosovë. Veçanërisht, e pa nga afër ndikimin që korrupsioni politik ka në ndërtimin e sundimit të ligjit dhe të institucioneve të pavarura demokratike. Fusha bazë e interesit dhe kërkimit të tij përfshin aspektet e procesit të ndërtimit të shteteve në shoqëritë në transicion, me theks të veçantë në ndikimin që korrupsioni politik ka në ndërtimin e institucioneve demokratike. Aktualisht drejton njërin nga bizneset më të suksesshme në industrinë e fast-food-it në Prishtinë.